MIRANDÉS: LA OUTRA LHÉNGUA DE PERTUAL

CARLOS FERREIRA 

Cun que regras se scribe l mirandés?

Habendo sido até hai mui pouco tiempo ua lhéngua percipalmente oural, l mirandés scribe-se zde la fin de l seclo XIX (1884) i la obra Flores Mirandesas de José Leite Vasconcellos fui la purmeira obra screbida an mirandés. Solo an 1999 saliu la Cumbençon Ourtográfica de la Lhéngua Mirandesa. Esta fui feita por faladores i studiosos de l mirandés i por sabidos lhenguistas de ls Centros de Lhenguística de la Faculdade de Lhetras de Lisboua i de la Faculdade de Lhetras de Coimbra, de que subírten las Doutoras Manuela Barros Ferreira, Rita Marquilhas i Cristina Martins i l Doutor Ivo de Castro. Ls dous cordenadores de la Cumbençon Ourtográfica de la Lhéngua Mirandesa, fúrun la Doutora Manuela Barros Ferreira de l Centro de Lhenguística de la Faculdade de Letras de Lisboua i l Dr. Domingos Raposo porsor de lhéngua mirandesa ne l Agrupamiento de Scuolas de Miranda zde 1986. An 2000 fui aprobada la Purmeira Adenda a la Cumbençon Ourtográfica.

Na fin de l seclo XIX i até als anhos quarenta de l seclo XX, publicórun-se ls purmeiros scritos, mui acupados cula riqueza de la fonética, mas cun regras mui cumplicadas. Fui Gonçalves Viana, quien purmeiro aprepuso un sistema mais simples, seguido apuis pul própio Leite Vasconcellos i por scritores cumo Bernardo Fernandes Monteiro, Manuol Sardina i Fracisco Meirinhos.

La Cumbençon Ourtográfica de la Lhéngua Mirandesa, i las sues Adendas, permitírun ua creciente harmonizaçon de la scrita, que ye hoije seguida por to ls outores que scríben an mirandés i que ye tamien la seguida pulas scuolas adonde s’ansina mirandés. Las çcuçones al redror de la scrita déban cuntinar, percipalmente porque inda hai algues questones an abierto.