L NATAL DE LA MIE ALDÉ

CARLOS FERREIRA

L Natal de las grandes capitales, ten más lhuzes que l Natal de la mie aldé,

Mas l Natal de las grandes capitales, nun ye más guapo que l Natal de la mie aldé,

Porque l Natal de las grandes capitales, an nada se parece al Natal de la mie aldé!

Las grandes capitales ténen remilhones d'anfeites i lhuzes,

de to las quelores a acender, a apagar, a cegar,

i sotos cun muitas montras a atirar brilho acontra ls uolhos:

cacharros, canabarros, pandilhas i eiludidas marabilhas!

i coincemos-le ls nomes: Paris, Londres, Lisboua, Nuoba Iorque...

i to la giente sabe desso.

Mas poucos sáben cumo ye l Natal de la mie aldé:

i la fogueira de l galho grande que fazemos,

i que calece to l mundo que a eilha s'achega por un eigual.

i las campanas de l nuosso campanairo que tócan solo para nós!

i por esso l sonido pertence solo als que alhá stubirmos!

i muitas amigas i amigos, coincidos, al redror la fogueira de l galho!

Ye por esso más lhibre i más caliente l Natal de la mie aldé.

Pa las grandes capitales bai-se d'abion,

Na mie aldé nun hai aeroporto,

Nien palácios, nien fortunas que manginamos por trás las jinelas altas,

L Natal de la mie aldé, nien sequiera faç manginar an nada,

Quien passa l Natal na mie aldé, quier solo passar l Natal na sue Aldé!

i inda stá alhá miu pai, mie mai, mius armanos,

cunhadas i cunhado,

la mie tie, ls mius filhos, ls miu sobrinos i sobrinas-nietas,

i tenemos ua piedra burmeilha que se chama B,

i desso naide sabe!

porque fumos nós que l'ambentemos. Solo para nós!

i ne l Natal de la mie aldé,

hai uas lhuzes a piçcar ne l fruntal de l'eigreija,

que dízen: BUONAS FIESTAS.