 |
| CARLOS FERREIRA |
Ua lhéngua biba nunca stá agarrada a un território, mas solo a las pessonas que la fálan, i por bias desso, l mirandés, tal cumo outra lhéngua qualquiera, puode falar-se an to l mundo adonde haba ua pessona que lo querga i saba falar. Bendo las cousas doutra maneira, podemos star a correr l risco d’acumparar ua lhéngua a ua raça animal outótone, que ten l sou solar nun determinado território mui preciso!
Falando de l território adonde la lhéngua fizo la sue caminada stórica, l mirandés ye falado ne l cunceilho de Miranda de l Douro, tirando dues aldés, Atanor i Teixeira, i an trés aldés de l cunceilho de Bumioso, Caçareilhos, Angueira i Bilasseco, todo drento de l çtrito de Bergáncia. Tamien ne l cunceilho de Bergáncia, se cunserba outro falar sturlhionés, culas mesmas caratelísticas que l mirandés, sobretodo an quatro aldés: Riu d’Ounor, Guadramil, Deilon i Petisqueira. Mas l trabalho zambulbido pula sue cunserbaçon, recuperaçon i promoçon, ten sido quaije nanhun. Este território ten ua superfície d’alredror 500Km2 i alhi móran a la buolta de 8000 pessonas.
L mirandés ye tamien falado an amportantes juntouros de pessonas mirandesas que son benediços nas percipales cidades de l paíç i strangeiro. Por junto cuida-se que lo falaran por ende uas dieç mil pessonas, ambora este númaro nun puoda ser apersentado cumo rigoroso, nien a el se le deba dar muita amportança: porque ua lhéngua ye ua lhéngua, para alhá de l númaro de pessonas que la fálan.
Zde 1986 que l mirandés ben sendo ansinado ne l Agrupamiento de Scuolas de Miranda de l Douro, agora an todos ls níbles, i ls ninos mirandeses cada beç mais ténen proua de l falar i screbir, sobretodo nas redes sociales.
Sem comentários:
Enviar um comentário