LA LHIBERDADE DE L’AUGA

CARLOS FERREIRA

Será lhibre l’auga? Cuorre par’adonde le dá la gana, i quien cuorre por guosto: ye lhibre! Al menos mil bezes an abril!

Ten l’auga muitos nomes: tantos cumo las lhénguas que costruírun las mulhieres de to l mundo. La maiorreferença d’auga que hai na Tierra de Miranda: ye Douro. Nome mui antigo: hai quien afirme que ben yá de la palabra celta ‘dur’, q’outra cousa nun quier dezir que nun seia auga. Ben todo a dar al mesmo? Nun acredito: cada palabra quando la dezimos fai cuçquinhas na boca de maneira mui çferenciada. Reson tenie Einstein cul sou absolutismo de la relatibidade i Heisenberg cula certeza de la ditadura de las ancertezas: outras augas!

Astanho, por eisemplo, al menos nas lhatitudes de l nuosso pequerrico retanglo, a l’auga dou-le na gana de se chober bien mais que la cuonta anhiega! Nun stube mui atento a essa ambora, mas aposto que andou a fazer secas por outros lhados: cumo bemos, ye sempre çcutible la democracie de l’auga. 

Yá algue beç andestes nua muntanha ruça? You yá: acabei amarielho cumo la gualdra, cul stómado rebuolto, capaç de m’aguemitar!

Mirai bien pa ls andarilhos de l’auga: cai de l cielo cua naspa d’açelaraçon g; bate ne l suolo, arrepincha-se an remiles de goticas i ampeça lhougo a correr al para baixo, siempre al para baixo! Até chegar al mar! I apuis ne l mar: siempre a abanar cumo ls barcos. Nun le dolirá la cabeça a l’auga de tanto bater nas piedras de ls rius i ribeiras? Nun quedará mal çpuosta de tanto s’abanar ne l mar?

Por bias destas cabeçadas todas, l’auga queda muitas bezes maçada, cun delor de cabeça, i por esso s’anfunisga pula tierra abaixo, i queda a çcansar durante remiles d’anhos, antes de s’amostrar outra beç: auga que chuoba nun cabeço, nien que seia mil anhos apuis, salirá outra beç nua fuonte mais abaixo! Ó anton toca-le ua calote polar! I ende batibarba de friu: mas diç que la cousa anda pa se derretir! Cuidado!

Apuis de tanto tiempo, pa se calcer dessa frie eiternidade, deixa-se l’auga buer por un qualquiera animal, ou por un animal home ou mulhier, i cumpon-lo a mais de 50%, i cuorre-le pulas benas caliente, al para baixo i al pa riba: si, tamien l’auga cuorre al parriba. I se le toca ua tie que faç retençon de lhíquidos? Speta-se-le na celulite i deixa-se quedar até que la tie faga ua lhipossucçon. I apuis dius antendiu que to ls animales habien de mijar: i esso fui un alíbio.

L’auga bei-se muitas bezes a braços cul sol, porque este manda mais. Mas hais outras an que se dán tan bien, q’até ampónen la cinta de l raposa: cun to las quelores, i por esso stá tamien alhá la quelor de ls crabos burmeilhos.

Yá bai alto l eiquinócio, l eimbierno stá anfermo: muorre-se de calor, nun tardará. I nós yá tenemos ganas de solstício: por bias d’haber menos auga: clara!

La primabera ye ua lhambiçgoia. Lhougo antes de nacer, ten uas tetas scandalosas, chenas de lheite de to las quelores, ourdidas pul sol i l’auga, mas apuis l berano namora-la, calece-la, brinca-la, ampreinha-la, seca-la i grana-la. I cumo ua mala mai, la primavera bai-se a tener outra beç cul eimbierno, pa que la çfrie de tanta lhuxúria, i manda l outonho parir to las granaduras de que s’amprenhou. Esta manie de las lhiberdades!?